Isang matalinong aso, tinulungan ang dalawang batang naglalaro na kuhanin ang nahulog nilang bola sa tubigan!

Ang pagkakaroon ng alagang hayop ay isa lamang sa ating pamamaraan upang mas maging relaks sa buhay. Madalas kasing nakakawala ng pagod ang mga alaga nating hayop.

Ang mga tipikal na pet ngayon ay aso, pusa, isda, ibon, rabbit, hamster, at marami pang iba. Mayroon din namang iilan sa atin ang nahihilig sa pag-aalaga ng mga exotic animals tulad ng mga gagamba, scorpion, ahas, at marami pang iba.

Anumang uri ng hayop ang ating inaalagaan, lahat tayo ay nagiging mas responsable at disiplinado. Upang maalagaan kasi ang mga hayop na ito ay talagang paglalaanan dapat sila ng oras at panahon.

Hindi lamang pagkain, bitamina, maayos na lugar o tahanan, kundi maging ang mga laruan at iba pang pangangailangan ng ilan sa mga hayop na ito ay talagang pinaglalaanan natin. Madalas din nating marinig na kapag ikaw ay mayroong alagang hayop ay para bang mayroon kang karagdagang anak, kaibigan, o kapamilya.

Kamakailan lamang ay marami ang bumilib sa asong ito matapos niyang tulungan ang dalawang batang naglalaro. Marahil ay anak ng kaniyang amo ang dalawang batang ito.

Masaya silang naglalaro ng bola ngunit bigla na lamang napunta sa tubigan ang kanilang munting bola. Agad na tumakbo ang batang babae sa loob ng kanilang tahanan upang humingi ng tulong sa kanilang mga magulang.

Habang ang batang lalaki ay naiwanan at pilit na inaabot ang munting bola sa tubigan. Sa pagmamatyag ng kanilang aso ay bigla na lamang itong lumapit sa batang lalaki at tila pinalalayo niya ito sa panganib habang pinipilit nitong abutin ang bola.

Nang masigurado ng aso na ligtas ang batang lalaki ay mayroon itong inabot na isang mahabang bagay. Ito ang ginamit niya upang masungkit ang bola ng mga bata sa tubig.

Hindi nagtagal at kaagad na nakuha ng aso ang bola at ibinigay ito sa batang lalaki. Umani ng maraming komento at reaksyon ang video na ito.